Interneten gero eta kanpaina gehiago dago enpresei euskararen aldeko neurriak har ditzaten eskatzeko

Han-hemenka ugaritzen ari dira enpresek euskararen aldeko neurriak hartzea helburu duten kanpainak. Horietako batzuk jaso ditugu albiste honetan:

Segi irakurtzen

- Orona igogailu enpresak web gunea euskaraz jartzeko eskaera egiteko eskatu dute bi blogetan (horregatik argazkia), Aldabataria.net-en eta Euskaraz Ostia!-n. Biek ala biek nabarmendu dute Oronak egoitza nagusia Hernanin duela eta Arrasaten kokatzen den multzo are ezagunago baten partaide dela.

- Lander Iruretagoiena Semaforoarekin harremanetan jarri da, gogorarazteko kanpaina bat jarri zuela abian Travel Cluek informazioa euskaraz bideratzeko. Landerrek bidalitako mezutik hau nabarmendu nahi dugu:

Nahiz eta niretzat “arrakasta” izan 100 erantzunetik gora izatea, ez dut uste nahiko izango denik Travel-en parte hartzen duten enpresen hizkuntza politika aldatzeko (auskalo!).

Ez dakit zenbat erabiltzaile izango dituen txartel horrek EHn. Agian, 500.000? Eta horietatik, familia/norbanako euskaldun… demagun 150.000?? Eta horietatik euskaraz konfiguratua… suposatzen dut % oso txikia. Ez daukat ideiarik, baina ahalik eta gehien izatea beharko genuke.

- Guggenheimek antolatzen dituen bisitaldiak gaztelaniaz, frantsesez eta ingelesez soilik eskaintzen dituela ikusita, e-mail bidezko kanpaina bati hasiera ematea erabaki zuen Urtzi Odriozolak, eta bere izenean, mezua idatzi zion museoko arduradunari, eta euskarazko bisitaldiak egitea lortu du, aldabataria.net-en irakurri dugunez.

- IKEArekin ere bada lanketa: Euskaraz Ostia! blogean irakurri dugunez, eskaerak egiten ari dira Hiriburuko IKEAn euskararen aldeko neurriak har ditzaten. Semaforoan ere izan zenuten horren berri duela hilabete batzuk.

- Posta elektronikoz mezuak bidaltzea hutsala dela uste dutenentzat, gogorarazi nahi diegu Iberdrolak web gunea euskaratu zuela Semaforoak eta beste batzuek bideratutako eskaeren ostean. Kasualitatea?