2011/12/22

Euskaraz bizitzeko nahia hedatuz doa (Kontseilua)





Kontseiluak urriaren 28an aurkeztu zuen “euskaraz bizi nahi dut” dinamika berria. Dinamikaren funtsa jendarte mugimendu zabala eratzea da. Euskaraz bizi nahi duen orok lekua du dinamika honetan. Eta nahi duen espresio edo agerpen mota erabiliz egin dezake ekarpen hori. Asko gara euskaraz bizi nahi dugunok, jadanik euskaraz bizitzeko hautua egin dugunok. Hortaz, norbanakoari adierazi nahi diogu ez dagoela bakarrik.

Segi irakurtzen


Norbanakoez harago ere, gizartearen arlo desberdinetan lanean ari direnei ere Kontseiluak egindako hausnarketa aurkeztu eta dinamikan parte har dezaten proposatu zaie eta proposatuko zaie aurrerago ere. Modu horretan, hezkuntza arloa, alor sozio-ekonomikoa, espresio artistiko desberdinak… dinamikan txertatuko dira.

Hemendik, gure leiho xume honetatik, Tolosaldeko herritarrei dinamika honetan parte hartzeko deia luzatu nahi dizuegu. Garai berri hau euskararen garaia izango dela bermatu behar dugu guk guztiok. Herritarron eta euskaltzaleon mezua ikusgai jarriaz gure nahia eta eskubidea aldarrikatu behar dugu.

Datorren urterako gonbitea: 2012an zatoz gure dinamikara eta euskaraz bizi nahia adierazi, erakutsi, abestu, aldarrikatu, oihukatu… Hementxe dezu horretarako sortutako webgunea: www.euskarazbizinahidut.org.

Read more...

2011/12/20

Kirol eta aisialdiko esatari izateko ikastaroa antolatu dute Mintzolan




Ez al duzu inoiz tentaziorik izan kirol eta aisialdiko esatari lanetan aritzeko? Hementxe duzu aukera! Gipuzkoako Foru Aldundiak eta Donostiako Euskararen Udal Patronatuak urtarrilean antolatuko dute Kirol eta aisialdiko esatarientzako ikastaroa.

Kirol eta aisialdi ekitaldietarako aurkezle euskaldunak prestatzeko teknikak eta baliabideak eskainiko dituzte ikastaroan. 2012ko urtarrilaren 14tik martxoaren 24ra izango da Mintzola Fundazioaren egoitzan, Villabonan. 40 ordutako iraupena izango du.

Informazio gehiago nahi baduzu, jo Diputazioaren webgune honetara.

Read more...

Nolako elebitasun eredua bultzatzen dugu halako seinaleekin?


Gero eta gehiago dira eskualdeko mila bazterretatik gurekin harremanetan jarri eta zenbait egoera salatzen dutenak. Goiko argazkia Ibarran atera du Patxik, eta honako mezu hau bidali digu:

"Hau al da bultzatzen ari garen elebitasun eredua? Hitz bat euskaraz, eta beste guztia gaztelaniaz? Yo soy bilingüe. Saludo en euskara, y luego sigo en castellano...

Semaforo gorria elebitasun horri!"


Halako mezuak bidaltzeko, hauxe da gure helbidea: euskararensemaforoa@gmail.com.

Read more...

2011/12/13

Zizurkildar bati gaztelaniaz eta portugesez idatziriko testu bat sinarazi dio Osakidetzak


Zizurkildar bati gaztelaniaz eta portugesez idatziriko testu bat eman diote sinatzeko, eta ez zegoen ez Portugalen, ez Gaztelan. Mikel Ugartek Berria egunkariaren bidez salatu du Osakidetzan gertatutakoa. Hona hemen Mikelen idatziaren bi pasarte:

Segi irakurtzen


"Bada, ez dut ulertzen nola den posible: gazteleraz eta portugesez idatziriko testu bat sinarazi zidaten gure bigarren haurra jaio eta bi egunera egin behar zioten proba bat baimentzeko".

"Baina ez dut ulertzen nolaz zegoen gazteleraz eta portugesez testu hura. Atzerritar bati bere hizkuntzan eskaini ahal balitzaioke nondarra den begiratu gabe, asko irabaziko genuke, batez ere ospitale batean sinatu behar diren testuak ongi ulertu beharrekoak direlako, gaizki-ulertuak ahalik gehien ekiditeko, baina euskaraz behar luke bai ala bai. Ez dago aitzakiarik".

Artikulu osoa irakurri nahi baduzu, Berriaren webgunera jo dezakezu.

Halakorik edo antzekorik gertatu bazaizu, ez geratu isilik. Idatziguzu eta zuri gertatutakoaren berri emango dugu: euskararensemaforoa@gmail.com.

OHARRA: Argazkia EHEren webgunetik atera dugu, eta Oiartzunen egindako ekintza batena da. Osakidetzak euskaldunoi eskaintzen digun ateak itxita darrai.

Osakidetzarekin lotutako beste albiste batzuk ere argitaratu ditugu:

- Osakidetza eta euskara: zer gertatzen ari den jakiteko "pista" batzuk (Semaforoan, 2011-08-01)

- Osakidetza eta euskara: Hamaika Telkebistak ere landu du gaia (Semaforoan, 2011-09-08)

- Kepari gertatu zaiona ez al zaigu gehiegitan gertatzen? (Semaforoan, 2011-05-03)

- Nolako pediatra nahi dugu? Euskalduna? Kalitatezkoa? Euskalduna eta kalitatezkoa? (Semaforoan, 2010-11-25)



Read more...

"Salmenta euskaraz" ekimena herriz herri dabil eskualdean


Argazkikoa "Salmenta euskaraz" izeneko postu ibiltaria da, eta Banaiz Bagara Elkarteak euskara etorkinekin egiten ari den lanketarekin zerikusia du. Bertan, Katxiporreta eta Irrien Lagunen azken produktuak egoten dira: Azken CDak eta DVDak, aldizkariak, arropa eta Pupu eta Lore panpinak. Berria eta Euskal Herriko Plazaren produktuak ere jarriko dituzte standean, baita Kontseiluak sortutako arropa ere.

Segi irakurtzen

Euskara ikasteko zailtasunak dituzten pertsonei, eta batez ere etorkinei, lanaren bitartez euskara ikasteko eta euskaraz lan egiteko aukera eman nahi die NEL proiektuak.
Proiektu pilotu honen arlo bat da da Salmenta euskaraz lantaldea. 2011ko irailetik aurrera, Tolosako kultur etxean ekimen honen inguruko ikastaroa ematen hasi ziren, eta urrian irten ziren lehen aldiz kalera produktuak saltzera.

Eskualdeko azoka eta txokoetan ikusi ahal izango duzue. Tolosan eta Villabonan postua astero jartzen dute, azoka egunetan. Tolosan beste data bat ere finkatu dute; izan ere, hilaren 17an, Mundialak kantu taldearen entseguan egongo dira, Laskorain Ikastolan, 17:00etatik aurrera. Horrez gain, eskualde guztira zabaltzea ere gustatuko litzaieke euren euskarazko salmena gunea.

Informazio gehiago nahi izanez gero, jo Tolosaldeko Hitzaren albistera (bertatik atera dugu argazkia) edo Banaiz Bagara elkartearen webgunera.

Horrez gain, Petrak etorkinei eta euskarari buruzko artikulu interesgarri bat plazaratu du Gipuzkoako Hitzan: "Espainiara al datoz etorkinak?" (Erabili.com-etik).

Read more...

2011/12/07

"Euskaraz bizi nahi dut" liburuaren aurrerapena egin du Kontseiluak Durangon


"Euskaraz bizi nahi dut" liburua aurkeztu du Kontseiluak Durangon. Liburuan, euskaraz bizitzearen aldeko dinamikaren barnean hainbat arloko jendea egiten ari da ekarpena. Guztira, hogeita bat idazlek eta beste hainbat ilustratzailek sortutako testuekin eta marrazkiekin osatutako liburua da.

Euskaraz bizi nahi dut liburua hemendik aste batzuetara argitaratuko den arren aurkezpen-aurrerapen bat egin da Durangoko Azokan. Liburuan parte hartu duten hogeita bat idazle horietatik lau gonbidatu izan dira aurkezpen honetan: Aurelia Arkotxa, Yolanda Arrieta, Unai Elorriaga eta Castillo Suarez. Idazle bakoitzak liburuan argitaratuko den bere testua irakurri du, euskaraz bizitzeko nahi hori islatzen dute testuetan.

Informazio gehiago nahi baduzu, jo Kontseiluaren webgunera. Argazkia ere bertatik atera dugu.

Read more...

  ©Template by Dicas Blogger.