2012/02/28

Osakidetzakoentzat hizkuntz eskubideak ez dira pazienteen eskubideetan sartzen?


Mikelek mezu hau bidali digu:

Osakidetzari egindako kritikak direla-ta, begira zer aurkitu dudan: Donostiako Ospitalean ingresatuta daudenei bi liburuxka jartzen dizkiete ohearen aldamenean: "Pazientearen eskubideak" eta "Erabiltzailearen gida". Biak gaztelaniaz eta euskaraz daude, baina hitz bakar bat ere ez da aipatzen hizkuntz eskubideei buruz. Hitz bat ere ez. Zer esan nahi du? Ez daukagula eskubiderik?


Read more...

Euskara eta ingelesa dakiten elebidunak behar ditugu?


Txillardegi hil berriari buruzko blog baten berri izan dugu (http://txillardegi.wordpress.com), eta atentzioa eman digute Txillardegiren esaldi hauek:

"Ñabardurka hemen alboan utziz, hauxe egin dute: funtzio arruntetarako («zentralak» Txepetxen diagramei dagokienez: familia, lagunartea, eskola, udala, prentsa…) nazio hizkuntza erabiltzea. Eta funtzio ez arruntetarako (goi mailako jakintza eta teknika, zientzi bibliografia, harreman internazionaletarako, etab.) ingelesa".

"Horra hor xedea, ene ustez, irakaskuntzan ere, pausuka baina irmoki, mamitzen hastekoa. Hirugarren (edo laugarren) hizkuntzen arazoa (eta multzo honetan kokatu behar ditu abertzale denak gaztelania eta frantsesa), eztabaidan jar dezagun".

Eta gaztelania? Eta frantsesa? Eredu ona da bi hizkuntza horiek baztertzea? Zerk egingo dio mesede euskaldunari/euskarari? Ze etorkizun izango genuke euskara eta ingelesa dakiten elebidun nagusi liratekeen herri batean?

Read more...

2012/02/22

Osakidetzaren telefono bidezko arreta sistema berrian euskara baztertzen dute


Ondarroako udal euskara teknikariak honako kexa helarazi digu Osakidetzaren telefono bidezko arreta zerbitzua (PDFa) dela eta:

Irakurri mezua



Duela hil batzuk hasi ginen Osakidetzaren telefono bidezko arreta sistema berrian euskara baztertzen dutela salatzen. Hainbat tokitan salatu dugu: Osakidetzan, Behatokian eta Elebiden. Elebidek bidali berri digu erantzuna (2012-02-09an). Bertan diote Osakidetzak aldaketak egin dituela edo egingo dituela otsailaren 1etik aurrera. Guk egin ditugun deietan halaxe egiaztatu dugu, egin ditu aldaketak, baina segitzen du euskara baztertzen. Euskaraz “Egun on” besterik ez digute esaten.

902 203020ak honela erantzuten du:

(Otsailaren 10a arte) ….Le atiende un sistema informatico….. ¿en que idioma desea ser atendido, en euskara o en castellano?


Otsailak 15ean, berriz, honela dio sistema horrek berak:

Osakidetza, Egun on,
Buenos dias.

Si desea ser atendido en euskara diga euskera o pulse 1


Si desea ser atendido en castellano diga castellano o pulse 2


Bi bider mezu bera (beraz, hor ere euskarazkoa baztertzen du). Handik segundu batzuetara, beste hau dio:

Si desea cita si con su medico de cabecera, enfermera o pedriatra pulse 1


Si desea cita si desea otro servicio diga otros o pulse 2


Guk kexuak bidali genituen 2011ko irailean: Osakidetzara, Behatokira eta Elebidera. Eta berriro egingo dugu.


PD: Eta, gainera, hizkera sexista erabiltzen dute: medikuak gizon eta erizanak emakume.


Semaforoan, gure aldetik, Osakidetzaren iradokizunen posta elektronikora (osarean.iradokizunak@osakidetza.net) mezu hau bidali dugu, eta gomendatzen dizuegu gauza bera egitea:

Euskalduna naizenez, eskertuko genizueke telefono bidezko arreta zerbitzua euskaraz erabili ahal izateko neurriak hartzea.

Zoritxarrez, Osakidetzako helbide horretara bidalitako mezuak bueltan iristen dira. Zergatik ote? Aldabatarian ere kexa bera adierazi dute.

Read more...

2012/02/21

Hara! Poliziari euskaraz hitz egitea ez da delitua... ezta Nafarroan ere!


Nobedadea: poliziari euskaraz hitz egitea ez da delitua. Hori ondorioztatu dezakegu Itziar Claver eta Haizea Ramirez Altsasuko Euskal Herrian Euskaraz taldeko kideei gertatutakotik.

Ezabatu eta Euskaraz bizi ekimenaren baitan, Foruzainek identifikatu egin zituzten, eta handik bi hilabetera isuna jarri zizkieten:

- Foruzaingoari euskaraz egitea desobedientziatzat hartu zutenez, 150 euroko bi isun.
- Trafiko seinaleaak eraldatzeagatik, 3.000 euroko bi isun.

Oraintsu jakin dugu desobedientziarekin lotutako isunak bertan behera utzi dituztela. Ez, ordea, besteak.

Beraz, badakizue: poliziarekin euskaraz hitz egitea ez da delitua... ezta Nafarroan ere!

Informazio gehiago nahi baduzu, jo EHEren webgunera. Guk bertatik atera dugu argazkia.

Read more...

2012/02/20

Iñauterietan murgildu aurretik, solasaldia egin genuen Txolarre Irratian


Iñauterietan murgildu aurretik, solasaldia egin dugu Txolarre Irratian. Honako gai hauetan hausnartu dugu:

Lehenengo zatian, Jaurlaritzak saltoki handietan eta bestelako enpresetan euskararen aldeko neurrien aurka hartutako erabakia izan dugu hizpide.



Bigarren zatian, Leizaola elkargoak egindako bideoen gainean aritu gara, eta horrek diru laguntzen ajeei buruz hitz egitera eraman gaitu.



Hirugarren zatian, Ibaialde ikastolari buruz mintzatu gara, eta Nafarroako Gobernuaren jarrera kritikatu dugu.



Azken zatian, Txolarreren bertso jaialditik abiatuta Egigurenen adierazpen polemikoak izan ditugu hizpide, eta, nola ez, Iñauteriez ere aritu gara. Kezka hau mahaigaineratu dugu: zergatik erabiltzen dute euskaldunek hainbeste erdara juerga eta umore giroan?


Read more...

2012/02/16

Patxi Lopezen euskara klaseak ez al dira garesti samarrak?





Berria egunkariaren bidez jakin dugunez, Patxi Lopezen euskara klaseak gero eta garestiagoak dira: 2010ean 36.600 euroko gastua (inbertsioa?) izan ziren, iaz 40.235 eurokoa, eta aurten 48.231 eurokoa aurreikusita dago.

Albistea argitaratu denetik, sarea sutan dago. Gure iritzia da garesti samarrak direla klaseak, ezta?

Zuzeu albistarian ere hausnarketa interesgarriak egin dituzte albistearen gainean.

Twiterren ere badago zer irakurria gaiaren gainean: #patxilopezeuskalduntzen.

OHARRA: Goikoa Garatik atera dugu, eta Tasiorena da. Argazkia hobeto ikusteko, sakatu argazkiaren gainean. Gaztelaniaz egon arren, blogean jartzea erabaki dugu, Patxi Lopezek berak ere ulertzeko.

Read more...

2012/02/13

Zer egin euskaraz gaizki idatzitako kartelekin? Negar ala barre? (V) Matxura eten?


Beste argazki bat gure sekzio maiteenetako baterako: Zer egin euskaraz gaizki idatzitako kartelekin? Negar ala barre?

Zer da "Matxura eten"? Argazkia Aldabataria blogetik ekarri dugu gurera. Blog horretan Eukene Caballerok jarri du, hausnarketa honekin batera:

Segi irakurtzen


Igandean, astero bezala, zerbait hartzera joan ginenean herrira, Modelo zinema aretotik pasatzean pelikula iragartzen duen kartela ez zegoela konturatu nintzen. Horren ordez, ohar bat zegoen, goian gazteleraz, behean euskaraz.

Ez dakit zergatik, baina, lehendabizi, gaztelerazko oharra irakurri nuen eta hauxe esaten zuen: “Suspendido por avería”. Jarraian, euskarazko oharrera joan ziren nire begiak eta han zegoena irakurri nuen: “ Matxura eten”, zer? nola? matxura eten? Zer esan nahi du horrek? matxura martxan dagoela eta eten egin behar dela? oharra irakurri dugunok matxura eten behar dugula? laguntza eskatzen dute matxura eteteko? matxurak eten egin behar dira edota konpondu egiten dira?

Ikusten duzuen bezala, euskarazko ohar hori irakurri ondoren, hamaika galdera egin nizkion nire buruari horrek esan nahi zuena ulertu ahal izateko.

Idatzi duenak ulertuko du, ( hala pentsatu nahi dut); besteok, berriz… Hor konpon, Marianton!

Eukene Caballero



Read more...

Salduta utzi gaitu Jaurlaritzak euskaldunak? Kontseiluaren bideoa ikusgai!


Jaurlaritzak EAEko kontsumitzaile eta erabiltzaileei begira hartutako azken erabakien ildora, Kontseiluak bideo bat sareratu du kontsumitzaile euskaldunon hizkuntz eskubideen urraketa sistematikoa salatzeko.

Bideoa ikusi nahi baduzue, hementxe duzue:

Salduta from Euskararen Kontseilua on Vimeo.



Albiste honekin lotutako beste eduki batzuk:

- "Egina dago", Iñaki Lasa Kontseiluko kidearen iritzi artikulua (Berrian, 2012-02-14)

- "Adostasun zabalagoarekin euskara gehiago", Vicente Reyes PSE-EEko kidearen iritzi artikulua (Berrian, 2012-02-08)

- "Kontseiluak iragarri du PPk, PSEk eta UPyDk laster baliogabetuko dutela Kontsumitzaile eta Erabiltzaileen Estatutua" (Semaforoan, 2012-02-02)

- "Jaurlaritzak beste urrats bat eman du euskaldunon eskubideak zapaltzeko" (Semaforoan, 2011-10-06)

- "Euskara saltoki handietan eta bestelako enpresetan: Basagoitiren tesia garaile" (Semaforoan, 2011-06-16)

- "Balio ez zuena baliogabetu dute", UEMAren Zuzendaritzaren iritzi artikulua (Semaforoan, 2010-06-23)

Read more...

2012/02/10

Etsipenaren tenorean (Hasier Etxeberria)


Etsipenaren putzuan erori gara? Horixe da burura datorkigun galdera Hasier Etxeberriaren "Etsipenaren tenorea" artikulua irakurtzean. Hasierako esaldiak garai hobe bat iradokitzen digu: "Izan zen garai bat, arazo guztiek konponbidea zutena". Hortik aurrera, Etxeberriak hainbat gai ditu hizpide.

Artikuluaren pasarte batzuk bistaratzeko,

egin klik hemen:


- Euskal Herri euskalduna nahi genuenok —eta desira horren aldeko olatuan baizik bizitzen ez dakigunok—, uste genuen arrazoi garbizko geure nahia auzoari kontatutakoan, apostolatu moduko baten bidez, ametsa gauzatzea lortuko genuela. Geure insistentziarekin.

- Euskal Herri euskaldunaren ametsa ez da, beraz, estatuaren bide soiletik konponduko, askozaz ere konplikatuagoa baita euskal estatu ezinezkoa lortzeko kontu hori baino.

- Badirudi beste zerbait behar dela gaur deskribatu: “Bai, hizkuntza bat galdu egiten da besteek ikasten ez badute, ezin baita besteek ikasi gabetan hizkuntzarik izan”.

- Aurrerantzean ez digute, bada, ez independentziak, ez balizko estatu burujabeak eta ez norberaren ametsarekiko irmotasunak balio izango. Antza.

Artikulu osoa irakurri nahi baduzu, jo Etxeberriaren blogera.

Read more...

2012/02/06

Atzoko jaialdiaren ostean ere, Ibaialde ikastolak laguntza beharko du


Atzoko jaialdiaren ostean, ez lukete amaitu beharko Lodosako Ibaialde ikastolaren aldeko jarduerek. Elurragatik asko Sartagudara iritsi gabe geratu ziren, eta aurreikuspenak ez ziren bete.

EITBren blogean, atzoko festaren bideo ikus dezakezu:

Diruz ere lagundu nahi baduzu, Ikastolen Elkartearen webgunean duzu kontu korrontearen zenbakia.

Read more...

2012/02/03

Egigurenek Alberto Suriori esan dio ETBko gaztelaniazko kateak kentzeko, eta euskarazko eta kalitatezko bat jartzeko


Otsailaren 4ko Hitzetik Hortzera saioak emititu aurretik ere arrasto handia utzi du. Arrazoia? Jesus Egigurenek adierazi du Alberto Surio esan diola ETBk gaztelaniazko kateak kendu eta euskarazko bat, kalitatezkoa, jarri behar duela.

Egigurenek esandakoak entzun nahi badituzu, youtubera jo dezakezu (adierazpenak 02:39tik aurrera daude).

Ze iritzi duzu zuk? Bidaliguzu zure inpresioa facebookez edo posta elektronikoz: euskararensemaforoa@gmail.com.

Horrez gain, Zuzeun galdera hau planteatu dute: Dirurik ez balego, gaztelaniazko EITB kenduko zenuke?

Gai beraren gainean gauza gehiago jarri ditugu Semaforoan:

- Napartheitb gehiagorik ez! (Eneko Gotzon Ares) (Semaforoan, 2011-06-20)

- Maixol Arregi, ETB1en azken mohikanoa (Martin Kitto) (Semaforoan, 2010-10-20)

- Ingelesez ETBko euskarazko kateetan? (Oier Aranzabal) (Semaforoan, 2011-04-06)

Read more...

2012/02/02

Leizaola elkargoak zabaldutako bideoek soka luzea ekarri dute


Goiko argazkian bezala geratu gara azken egunotako polemika ikusita. Izan ere, soka luzea ekarri dute Vocento taldeak Leizaola elkargoari egindako kritikek, euskara sustatzeko omen diren bideo batzuen harira.

Leizaola elkargoak webgunean eman du azalpena
, baina horrek ez du kritiken zirimola geratu.

Bideoarekin lotutako iritzi batzuk bistaratzea nahi baduzu,

egin klik hemen


- [...] Bideoa ikustean, hain behartuta dauden pertsonen hizketaldiak entzutean, auzo lotsa sentitzea automatikoa da, kutresaltxitxerismoa. Muturra okerturik ikusi ditut bi bideoen zazpi minutuak, nire bizitzako estoizismo ariketarik latzenetarikoa.
(Ugaitz Zabala, Hitza eta Hotsak blogean)

- [...] Ze demontre da hau? Euskararen erabilera sustatzea omen du xede bideo bero honek. Leizaola fundazioak egin du. Edonor plazerez urtzeko modukoa… Puf, bideoak gustu txarreko hainbeste txiste merke egiteko aukera ematen du, eta oso zaila da tentazioari eustea.
(Jon Torner, Erredakzio mahaia blogean)

- [...] Leizaolari ere ez litzaioke tente jarriko. [...] Benetako asmoa, noski, zerbait atsegina, nolabait erakargarria helburu zuten egileek. Nik uste ez dutela lortu, baina inondik ez sexua erabali izanagatik, baizik eta bideoaren edukia oso-oso kaxkarra delako, ia negar egitekoa [...]
(Txema Arinas, Kexontziarena blogean)

- [...] Oso bitxia da Eusko Jaurlaritzak finantzaturiko bideo baten aurrean eskandalizatuarena egiten duten bi egunkari horiek egunero “relax” orrialdeetan prostituzioaren zabalkundea egitea, dirudienez, hortik etekin handia ateratzen dute eta. Beraz, ona litzateke hipokresiak alde batera uztea.
(Lurdes Auzmendi Hizkuntza Politikarako Sailburuordea, Euskarabloga blogean)

Zuk ere iritzia helarazi nahi badiguzu, idatzi erantzunen atalean, facebook bidez edo posta elektronikoz: euskararensemaforoa@gmail.com.

Read more...

Kontseiluak iragarri du PPk, PSEk eta UPyDk laster baliogabetuko dutela Kontsumitzaile eta Erabiltzaileen Estatutua


Kontseiluaren webgunean irakurri dugunez, Eusko Legebiltzarrak laster eman diezaioke "azken ostikada" Kontsumitzaile eta Erabiltzaileen Hizkuntza-eskubideak arautzen dituen 6/2003 Legeari. Iaz, PSE, PP eta UPyD alderdiek abian jarri zuten lege-aldaketa azken urratsak ematen ari da, eta, bide horretan, inolako baliorik gabe utziko dute kontsumitzaile eta erabiltzaile euskaldunen hizkuntza-eskubideak arautzea helburu zuen legea.

Paul Bilbao Kontseiluko idazkari nagusiak adierazi duenez, "Orain, arau-aldaketaren izapidetzean pauso bat gehiago eman eta erabakiaren aurkako zuzenketak atzera bota dituzte Legebiltzarreko Kontsumo batzordean. Ondorioz, prozesuak aurrera darrai eta hurrengo pausoa arau aldaketa Legebiltzarreko Osoko Bilkuran onartzea izango da".

Eduki honekin lotutako beste eduki batzuk:

- Jaurlaritzak beste urrats bat eman du euskaldunon eskubideak zapaltzeko (Semaforoan, 2011-10-06)

- Euskara saltoki handietan eta bestelako enpresetan: Basagoitiren tesia garaile (Semaforoan, 2011-06-16)

- Balio ez zuena baliogabetu dute (Semaforoan, 2010-06-23)


Read more...

  ©Template by Dicas Blogger.