Badaude eremu batzuk konkistatu ez ditugunak

Azkenaldian, hizkuntzek behar dituzten eremuen gaineko artikulu interesgarriak ari dira argitaratzen. Horien artean, Beñat Gaztelumendik Berrian idatzitakoa nabarmendu nahi dugu: "Hizkuntzak eta eremuak".

Besteak beste, gai hauek ditu hizpide: hizkuntza batek bizirik irauteko zenbat hiztun behar dituen, ezagutzak gora egiteak erabileran izan duen eragina, euskararentzako eremuak irabazi beharra...

Artikulua irakurri nahi baduzu, egin klik hemen.

Read more...

Nola ez diogu, bada, Hiromiri lagunduko?

Semaforoaren lagun adunar batzuen bidez Hiromi Yoshida japoniar euskalduna ezagutu dugu. Badira urte batzuk euskaraz hitz egiten ikasi zuela, eta orain euskarari buruzko ikerketak egiten dihardu. Hori dela eta, laguntza eskatu digu.

Segi irakurtzen

Hiromik hiru galdera hauei erantzuteko eskatu digu:

1) Orain arte ikusi duzun euskarazko pelikulak zein dira? (Pelikulan bertan euskaraz egiten diren pelikulak)
2) Horien arten zein izan duzu gustukoena? Eta zergatik gustatu zaizu gehien?
3) Euskarazko nobela eta ipuinen artetik, zein da gustukoen duzuna? Eta zergatik?

Galderen erantzunak honako helbide honetara bidali behar dituzu: udaberria7@aoni.waseda.jp

Lagunduko diozu, ezta? Nola ez!

Read more...

Bi hizkuntzen artean aukera dezakegula? Benetan?

Edurne Alegria Aierdi itzultzaileak euskaraz jarduteko aukerari buruz hausnarketa interesgarria egin du Gara egunkarian. Egun indarrean dagoen elebitasun orekatuaren diskurtsoa kritikatu du, eta euskararen normalizazioan beste fase batera pasa beharra aldarrikatu.

Artikulu osoa irakurri nahi baduzu, egin klik hemen.

Read more...

Maixol Arregi, ETB1en azken mohikanoa (Martin Kitto)

ETB1eko ikusle kopuruaren gainbehera ikusita, Maixol Arregirekin akordatzen naiz.

Maixol Arregik ez du uste gero eta telebista digital gehiago edukitzeak ETB1en gainbeheran eraginik duenik.

Maixol Arregik ez du uste ETB2k ETB1i zuzeneko konpetentzia egiten dionik eta ikusleak kentzen dizkionik.

Segi irakurtzen

Maixol Arregik uste du ETB1ek ez duela zertan aldatu ez edukirik, ez katearen eredua bera.

Maixol Arregik uste du eztabaida politikoak gardentasun osoz ematen direla ETB1en, guztien partaidetzarekin, alderdikeriarik gabe.

Maixol Arregik uste du ETB1eko buruek bereak eta bi egiten dituztela katea aurrera ateratzeko.

Maixol Arregik ez du uste EITBren buruan noentiendotarrak daudenik.

Maixol Arregik uste du supermerkatuan, unibetsitatean, institutuan, tabernan edo lantokian ETB1en ikusitakoa dela solasaldietako gai nagusia.

Maixol Arregik uste du ETB1 euskaldunen telebista maitea dela; batez ere, ikastolakumeena.

Maixol Arregik ez du uste ETB1en aurkako boikot inpliziturik dagoenik.

Maixol Arregiri "martzianokeria" iruditzen zaio Aingeru Epaltzaren hausnarketa hau: "Euskaldun anitzendako «deus interesgarririk eskaintzen duen katea» da gaur egun ETB1. Ez da (erabat) egia, baina bai erro sakonak dituen irudipena".

Maixol Arregik ez dizkio bere buruari galdera hauek egiten: Nora goaz ETB1ekin? Nora daramate? Nora daramagu?

Kontua da martxa honetan Maixol Arregi izango dela ETB1eko azken mohikanoa; hau da, ETB1eko ikusle bakarra.

Tolosaldeko Euskararen Semafororako, Martin Kitto (martinkitto3@gmail).

BADAEZPADAKO OHARRA: Maixol Arregi alegiazko izena da.

Read more...

ETB3n zinema jatorrizko hizkuntzan eta euskarazko azpitituluekin ikus dezakegu

Gauza batzuetan, behintzat, hasi gara beste berrialde batzuetako hizkuntz ohituren pare jartzen: ETB3n zinema jatorrizko hizkuntzan eta euskarazko azpitituluekin ematen hasi dira. Beste herrialde askotan ohikoa den bideari ekin diote, beraz.

Filmak "Zinematika" saioan emango dituzte, eta Facebook-en eta Twitter-en kontu bana ireki dute, ikusleen parte hartzea sustatzeko: facebook.com/zinemateka eta twitter.com/zinemateka.

Read more...

Adunako Udalak laguntza eskaini die herriko enpresei, lan munduan euskara bultzatzeko

Adunako Udalak gutunak bidali dizkie herriko zenbait enpresari, euskararen alde egiten duten lanarengatik zoriontzeko eta aurrerantzean ere euskararen aldeko lanarekin jarraitzeko laguntza eta aholkularitza eskaintzeko.

Segi irakurtzen

Zoriondutako enpresak honako hauek dira: Marmoles Arrilanak, Urritza jatetxea, Uztartza aterpetxea, Aburuza sagardotegia, Andretegi lore ekoizpena, Arregi Etxabe JJ birziklapen enpresa, Hol-Altz egun tratamenduko enpresa, Sointek animazio enpresa, Zabala sagardotegia eta Zumeta bizitegia. Horiez gain, Adunako Udalak eskura dituen baliabideak jarriko ditu laguntza eske doazen herriko enpresen esku.

Adunako Udalak iazko urriaren 9an sinatu zuen hitzarmena Galtzaundirekin, herriko enpresetan euskararen erabilera sustatzeko. Planean 90 enpresa sartu dira, eta Udalerri Euskaldunen Mankomunitateak ere laguntza eman du. Hasieran, planaren sustatzaileak enpresekin harremanetan jarri eta bisitak egin zituzten, enpresaz enpresa hizkuntz egoera zein zen jasotzeko. Udalak emaitzak baloratu eta jarrera eta neurri aproposena zutenak zoriontzea erabaki du, baita laguntza eta aholkularitza emateko bideak irekitzea ere.

Plan hau abian jarri arte, Adunako Udalak ez zuen inolako lanketarik egin, nahiz eta herrian enpresa asko egoteak asko baldintzatzen duen herriaren egunerokotasuna, baita hizkuntzaren presentzia eta erabilera erte. Nolanahi ere, plana ez zen zerotik abiatu. Sei enpresak Bai Euskarari Ziurtagiria zuten, eta beste askok, ziurtagiririk ez eduki arren, euskararen aldeko apustu garbia zuten eginda.

Read more...

Onuragarria al da euskaldun zarela adieraztea agergarri baten bidez?

Askoren ustez, euskaraz ez egiteko aitzakia/arrazoi nagusia euskaldunak identifikatzeko modurik ez egotea da. Nola eragotzi hori? Bittor Hidalgok hau proposatu du toki batean baino gehiagotan: euskaldunak agergarri bat eramatea soinean eta euskararen munduko erakundeek hori bultzatzea.

Sustatu.com-en, aldeko eta aurkako iritziak sortu dira: irakurri nahi badituzu, egin klik hemen.

Horrez gain, Euskal Harrotasunaren agergarriaren berri ematen duen webgunea bisitatu nahi baduzu, egin klik hemen.

Read more...

Bi andoaindarrek eskaera egin diote Tolosako Erregistro Zibilari haurra euskaraz erregistratzeko

Haizea eta Iñaki andoaindarrak guraso izango dira azaroaren 11ren bueltan. Haurra jaio ondoren zer tramite administratibo egin behar diren ikusten hasi direnean, sekulako ustekabea izan dute: gaur egun ezin da seme-alaba euskaraz erregistratu ez Andoainen, ez Tolosaldeko bake epaitegi bakar batean ere; Tolosako Erregistro Zibilean bai, ordea.

Hori dela eta, Tolosako Erregistro Zibileko arduradunari eskaera egin diote haurra jaiotzerako Andoainen euskaraz erregistratzeko bidea egin dezan. Legea alde dute, baina errealitatea aurka.

Semaforoa Iñakirekin egon da eskaera egin duenean. Hona hemen zer kontatu digun:

Segi irakurtzen

SEMAFOROA: Zergatik egin duzue eskaera?

Iñaki: Batetik, umea eduki ondoren ze tramite egin behar genituen begiratzen hasi ginen, eta ez zitzaigun burutik pasa ere egiten euskaraz egin ezin zitezkeenik. Tristea da: tramite batzuk ezin dira euskaraz egin, eta tokatu arte ez zara konturatzen.

SEMAFOROA: Egoera kafkiarra da, gainera. Izan ere, toki batzuetan egin daiteke baina beste batzuetan ez.

Iñaki: Ulertzen zaila da. Leku batzuetan bai, eta beste batzuetan ez. Eskubidea dugu hori egiteko, eta legean jasota dago eskubide hori, baina, segun eta non jaiotzen den haurra, egin dezakezu edo ez. Ez dago erraz ulertzerik. Zoritxarrez, toki batzuetan eskubideak exijitu behar ditugu.

SEMAFOROA: Zertan dago oinarrituta zuen eskaera?

Iñaki: Berrian eta Semaforoan irakurri genuen Usurbilgo gurasoen salaketa, eta UEMA eta Behatokia laguntza eskaintzeko prest zeudela jakin genuen. Haiekin harremanetan jarri eta eskaera eredua helarazi ziguten. Eskaeraren oinarria da haurra jaio aurretik jakinaraztea euskaraz erregistratu nahi dugula eta behar dituzten neurriak har ditzatela, dela euskarazko liburu bat jarrita (Aretxabaletan bezala), dela aplikazio informatiko bat instalatuta.

SEMAFOROA: Zer esan dizuete [Andoaingo] Bake Epaitegian?

Iñaki: Eskaera Tolosako Erregistro Zibilera bideratuko dutela eta handik iritsiko dela erantzuna. Badakite zenbait tokitan posible dela, eskubideak egikaritu daitezkeela, baina Andoainen oraindik Jaurlaritzak ez die sistema informatikoa egokitu. Espero dugu erantzuna haurra jaio aurretik iristea; bestela, berandu izango da guretzat. Esango dizuegu erantzuna iristen zaigunean.

SEMAFOROA: Zer esango zenieke egoera berean dauden gurasoei?

Iñaki: Aitei eta amei inplikatzeko esango nieke. Eskubideak errealitate bihurtzeko, mugitu beharra dago. Oso erraza da eskaera egitea. Gainera, iragarri dute urte bukaerarako euskaraz erregistratzea posible izango dela, baina erakundeek jakin behar dute euskaldunak ez garela horren zain geratuko, ez gaudela pasibo.

SEMAFOROA: Eta istorio honetatik zer ondorio pertsonal atera duzu?

Iñaki: Galdera horri erantzuteko Ruper Ordorikaren kantu bat etorri zait burura: “Inork ez zidan esan euskaldun izatea zein nekeza dan, hobe nuela munduko hiritar izatea”. Baina nekeza den arren, ahaleginak beti merezi du. Gai hauek ezin dute bakar batzuen arazo huts bilakatu, eta gero eta jende gehiagok parte hartzen badu, lorpenak helduko dira.

Semaforoak onena opa die Haizeari eta Iñakiri bere bizitza berrirako. Ea laster albiste onak ditugun!

Read more...

Euskara ikasteko, zure laguntza nahi du Asierrek

Durangoko Asierrek AEKn eman du izena, baina ez da ikasle arrunta. Ez, horixe! Astero bideo bat jarriko du Youtuben, nahi duenak berak egindako akatsak zuzentzeko.

Dagoeneko igo ditu pare bat bideo. Ikusi nahi badituzu, egin klik hemen.

Read more...

Nafarroa Oinez 2010: Tolosaldetik Atarrabiara, eta "Txikiak mundura"

Aurtengo Nafarroa Oinez Atarrabian izan da, "Munduz mundu" lelopean. Joan ginenontzat nahiz joan ez zirenentzat badago aukera oraindik haiei laguntzeko: Webgune bat ireki dute, eta, bertan, "Txikiak handi manifestua" jarri dute, hizkuntz txikiek ere bizirik iraun behar dutela aldarrikatzeko.

Helburua ahalik eta lagun gehienak sinatzea da. Sinatu nahi baduzu, sartu webgunean "Txikiak mundura" atalean.

Read more...

Atera arbela kalera!

AEK-koak Semaforoarekin jarri dira harremanetan, "Atera arbela kalera!" ekimenaren berri emateko.

Segi irakurtzen

Izan ere, zabalik da mintzapraktika programetan parte hartu nahi dutenek izena emateko epea. Adin, zaletasun eta euskara maila guztietako jendeak parte hartzera dei egiten du kanpaina berriak, "Atera arbela kalera" lemapean. Bideoa ere prestatu dute: ikusteko, egin klik hemen.

Horrenbestez, 10-11 ikasturtean mintzapraktika programa batean parte hartu nahi duten guztiek eman dezakete izena jada Euskal Herrian diren 70tik gorako egitasmoren batean. Mintzapraktika programetan edozeinek har dezake parte, berdin dio euskaldun zaharra, euskaltegiko ikasle ohia edo euskaltegiko ikaslea izan. Kanpaina honetan azpimarratu nahi dena zera da: euskara euskaltegitik kanpo egin eta entzun behar dugula, arbela atera nahi dugula, alegia.

Mintzapraktika programa euskaraz hitz egiteko ohitura duten pertsonak euskaraz hitz egiteko ohiturarik ez dutenekin elkartzean datza. Hori dela eta, Euskal Herriko lurralde guztietako hiri, herri eta auzoetan hainbat dira martxan dauden mintzapraktika programak. Egitasmoetako partaideek EHUko kredituak eskuratu ahal dituzte, bidaia eta egonaldietarako deskontuak, AIZU! eta Berria merkeago, eta beste hainbat abantaila.

Informazio gehiago nahi baduzue, egin klik hemen.

Read more...