7.000 lagun elkartu dira Baionan, euskararen ofizialtasunaren alde

7.000 lagun inguru elkartu dira Baionan egin den manifestazioan, Berrian irakurri dugunez (argazkia ere bertatik atera dugu). Manifestazioa Euskararen Gizarte Erakundeen Kontseiluak eta Euskal Konfederazioak antolatu dute, eta eragile ugariren babesa izan du.

Frantziar estatuko beste toki batzuetan ere jendetsuak izan dira elkarretaratzeak, deiadar.org webgunean irakurri dugunez: 6.000 lagun Perpynianen, 12.000 Kemperren , 3.000, Estrasburgen , 30.000 Tolosan eta 7.000 Baionan.

Baionako manifestazioaren hasiera ikusi nahi baduzu, egin klik hemen. Eta deialdia indartzeko Kontseiluak sareratu duen bideoa hementxe daukazu:

Euskalgintzaren deiadarra from Euskararen Kontseilua on Vimeo.

Read more...

Baionan dugu zita euskaltzaleok

Euskararen Gizarte Erakundeen Kontseiluak manifestazioa eta Euskal Konfederazioak manifestazioa antolatu dute Baionan martxoaren 31rako. Deiadar manifestazioaren leloa "Gure hizkuntzak, eskubide bat, lege bat" izango dela azaldu dute Bilbon egindako prentsaurrekoan. Kontseiluaren zuzendaritzak agerraldia egin du deialdiaren berri emateko eta euskaltzale guztiak bertan parte hartzera gonbidatzeko.

Prentsa ohar baten bidez, UEMAk jakinarazi du bat egiten duela deialdiarekin. Manifestazioa arratsaldeko 17:00etan abiatuko da Baionako Xaho kaitik, eta Frantziako beste toki batzuetan ere deialdiak egin dituzte hizkuntza gutxituen aldeko beste eragile batzuek.

Joango zara, ezta? Dudatan bazaude, seguru bideo honek gogoa piztuko dizula:

Martxoak 31 Deiadar manifestazioa, denok Baionara! from Euskararen Kontseilua on Vimeo.

Read more...

Tolosako Udalak gaztelaniaz jarri du iragarki bat prentsan (Euskaraz ostia)

Euskaraz ostia blogean Tolosako Udalak prentsan iragarki bat erdaraz jarri duela salatu dute. Honako hitz hauek erabili dituzte:

Gipuzkoa soziologikoki espainiartzeaz harrotzen den egunkari berdinean, Goierri bezala euskaldunenetakotzat jotzen den eskualde batean eta honetan ere Bilduk kudeaturiko udal baten eskutik, hiru hitz euskaraz eta eduki osoa erdara hutsean duen iragarkia argitaratu baitzuen atzo Tolosako udalak.

Noiz eta ezagun den Semaforoa bezalako bitartekoekin Tolosaldean elebikeria gainditzeko dinamikak sustatzen ari direnean, marka da gure hizkuntza baztertuz espainolaren erabiltze hau. Marka penagarri bezain salagarria!

Hona hemen Tolosako Udalaren hizkuntz erabilerarekin lotutako beste albiste batzuk:

- Tolosako Udalak semaforo gorria berde bihurtu du (Semaforoan, 2011-11-03)

- Ze hizkuntza politika du Tolosako Udalak kale seinaleetarako? (Semaforoan, 2011-09-14)

Read more...

Villabonan, supermerkatuko kartela euskaraz eta udalarena ele biz

Villabonako Igorrek posta elektronikoz idatzi digu, Villabonako elebitako kartela dela eta. Hau idatzi digu:

Semaforoan ikusi det nola atera diozuen argazkia Villabonako Udalaren kartel bateri (eta Manchesterrekoari). Kuriosoa iruditzen zait udalaren kartela euskeraz eta castellanoz egotea eta supermerkatu batekoa euskeraz bakarrik. Nik uste det absurdoa dala gauza batzuk bi hizkuntzatan jartzea, eta are gehiago udalak hori egitea eta supermerkatuak ez. Supermerkatua euskaltzaleagoa da udala baino?

Gai honen gainean edo beste baten gainean gogoetarik zabaldu nahi baduzu, idatziguzu helbide honetara: euskararensemaforoa@gmail.com.

Read more...

Herritarrek Aldundiarekin harremanak euskaraz izateko, errolda bat sortuko du Aldundiak

Gipuzkoako Foru Aldundiak diputazioarekin harremana euskaraz izan nahi dutenen errolda egiten hasiko da, hainbat hedabidetan irakurri dugunez. Horretarako, errenta aitorpenaren kanpaina baliatuko du Aldundiak.

Berrian irakurri dugunez, Zigor Etxaburua Gipuzkoako Foru Aldundiko euskara zuzendariak hau adierazi du: "Egun, kasu askotan, hori ez da posible, eta, alde horretatik, euskaldunak daude baztertuta".

Azkenik, hausnarketa pare bat: 2012an, Euskal Herriko herrialde batean euskaldun batek Euskal Herriko erakunde publiko batekin harremana euskaraz izateko aurrepausoak emateak semaforo berdea merezi du? Zergatik ez sortu euskara hutsez nahi ez dutenen errolda bat?

OHARRA: Argazkia Berriatik atera dugu.

Read more...

Topagunean federatutako tokiko hedabideek TOKIKOM enpresa eratu dute

Topagunea Euskara Elkarteen Federazioko bazkide diren 19 hedabidek (tartean Galtzaundi) eta Topaguneak berak TOKIKOM enpresa sortu dute. 2009an hasitako bideari jarraiki, enpresa berria tokiko hedabideen etorkizuna elkarlanean diseinatzeko tresna izango da.

Informazio gehiago nahi baduzu, Galtzaundiren webgunera jo dezakezu.

Read more...

Ze itxura eduki behar du euskaldunak?

Aldabataria blogean hausnarketarako beta ematen duen komiki bat aurkitu dugu (sakatu marrazkiaren gainean hobeto ikusteko). Marrazkia Jon Arangurenena da, eta, marrazkia ikustean, galdera hau sortu zaigu: ze itxura du euskaldunak? Eta ze itxura erdaldunak?

Duela urte eta erdi, antzeko egoera bat ekarri genuen blogera: Zergatik ez zuen jakin behar euskaraz? Beltza zelako?

Read more...

Arrakastatsua izan da Euskaraz Bizi Eguna

Arrakastatsua izan da larunbateko Euskaraz Bizi Eguna, eta Semaforoak zoriondu egin nahi du EHE egindako lan guztiagatik.

Eguna nola joan zen ikusteko, EHEren webgunera jo dezakezu.

Euskaraz Bizi Egunaren harira, egun horretan zenbat euskara erabili den izan dute hizpide Sustatun. Albistea ikusteko, egin klik hemen.

Read more...

Manchesterren zoriontzekoa dena Villabonan ere zoriondu behar al dugu?

Semaforoaren facebookean bolo-bolo dabil goiko argazkia: Manchesterren futbol estadioan ateratako argazkia da (Azkue Fundazioari esker izan dugu horren berri), eta kartela ingelesez, euskaraz eta gaztelaniaz dago. Dena da zoriona eta poza, euskarak tokia izan duelako, beste hizkuntza batzuekin batera.


Villabonan, berriz, beste seinale honek deitu du gure arreta (erdiko argazkia). Hori ere euskaraz dago, beste hizkuntza batekin batera. Hori ere zoriontzekoa al da? Arazorik sortuko al luke euskara hutsez balego? Erdaldun petoenak ere ez da du kapazitaterik seinalearen edukia ulertzeko? Seinaleak ele biz jartzea ez al da absurdoa toki batzuetan?

Albiste honek segida izan du. Ikusi nahi baduzu, egin klik hemen.

Duela aste batzuk, Ibarrako seinale batek ere eman zigun elebitasun ereduez hitz egiteko: ikusi hemen.

Read more...

ETB Nafarroan: eta orain, zer?

Nafarroan ETBrekin gertatutakoaren harira, bi hausnarketa egin nahi ditugu, ahots gora:

1.-Nola hitz egin daiteke hizkuntzen arteko elkarbizitza naturalaz? Ikusi Zaldieroaren hausnarketa goian) edo ikusi hemen.

2.- Eta orain, zer?

Kasuak zer esana ematen badizu, idatziguzu erantzunen atalean, facebooken edo bidali zure gogoeta posta elektronikoz (euskararensemaforoa@gmail.com).

Read more...

Euskara doan ikasteko proiektuak erantzun handia izan du Alegian

Tolosaldeko Hitzaren bidez jakin genuen Alegian etorkinek euskara doan ikasteko aukera izango dutela. Esperientzia pilotu horren ezaugarri nagusia zen euskara ikasteko nahiz alfabetatzeko eskolak antolatu dituela udalak, eta proiektua auzolanean oinarrituta dagoela, boluntarioekin.

Orain gutxi jakin dugu 37 lagunek eman dutela izena ikastaroak jasotzeko. Animo guztiei!

Alegiako alkateari egindako elkarrizketa irakurri nahi baduzu, jo Tolosaldeko Hitzara.

Read more...

Jaurlaritzak ekarpen itzela egin dio euskarazko umoreari: testu itzultzaile automatikoa

Gaztelaniatik euskararako testu itzultzaile automatikoa aurkeztu du Jaurlaritzak, eta guk, gure txokotik, asko estimatu dugu txiste elebidun txarrak egiteko eman digun aukeragatik.

Begira zer-nolako itzulpenak ematen dituen (ezkerrean, gaztelaniaz idatzi duguna, eta, eskuinean, euskarazko baliokidea, negritan):

Muchas gracias: Grazia asko.
Aupa Athletic: Athletic-a altxatzen du.
Arriba España: Goian Espainia.
Abierto mañana y tarde: Bihar eta berandu irekita (klasiko bat)
La prima de mi abuela: Nire amonaren saria.
Hoy hace buen tiempo: Gaur duela denbora on.
Necesito una cazadora de niña: Bat behar dut zamarra neskako.
Amo a Laura: Laura-rako Jabea.

Guk eskerrak eman nahi dizkiogu halako ekarpen umoretsuak egiten dituenari. Hortxe duzue, nahi dituzuen frogak egiteko: www.itzultzailea.euskadi.net.

Testu itzultzailearen gaineko hausnarketa serio eta mamitsuagoak egin nahi badituzue, beste toki hauetara joan beharko duzue: sustatura, erabili.com-era edo Berriara, besteak beste.

Zuzeun, Jaurlaritzaren itzultzailea eta google alderatu dituzte: zein da hobea?

Read more...

Badugu palindromo irabazlea: ANIMATUTA BAZEN, EZABATUTA MINA

Arrasate Euskaldun Dezagun taldekoek jakinarazi digutenez, Euskarazko Pelindromoen 2. edizioak badu irabazlea. Guztira, 61 palindromo jaso dituzte. Hona hemen bidali diguten mezua:

Irakurri mezua

Egun on:

Otsailaren 15ean amaitu zen Arrasate Euskaldun Dezagun euskaldunon elkarteak antolatutako Euskarazko palindromo lehiaketaren 2. edizioan parte hartzeko epea. Euskal Herriko hainbat txokotatik jaso ditugu palindromoak, Donostia, Azkoitia, Aretxabaleta, Zumarraga, Oiartzun, Lizarra, Alegi, Etxarri Aranaz, Eibar eta Gasteiz. Guztira 61. Arrasatetik ez dugu palindromorik jaso beraz Arrasateko palindromo onenaren saria hutsik geratu da.

Aurkeztutako 61 palindromoetatik kanpoan geratu ez diren 52en artean onena aukeratzea izan da Makos Gimeno palindromogilea, Oskar Elizburu Erdu-AEK euskaltegiko zuzendaria eta Amaia Arana Arrasateko Udal Euskaltegiko zuzendariak osatutako epaimahaiaren lana. Palindromoak ulergarriak eta hizkuntza aldetik zuzenak izateaz gain, beraien balio literarioa eta artistikoa, luzera eta aberastasun semantikoa baloratu dira.

ANIMATUTA BAZEN, EZABATUTA MINA!

Hauxe da Euskarazko palindromo lehiaketaren 2. edizioko Euskal Herriko Palindromo onena, Pasaian jaio eta gaur egun Aretxabaletan bizi den Juan Mari Agirreurreta Elosegik egina.

Amaia Arana epaimahaikidearen eskutik jaso du Agirreurretak ( argazkian) irabazitako saria, Debako Txindurri-Iturri Nekazal turismo sagardotegiari esker, bertan bi lagunendako sagardotegi afaria, logela eta gosaria.

Honekin batera bidaltzen dizuet saria banaketako argazkia.

Ondo izan

Maite Agirre Ena

AED elkarteko dinamizatzailea

Guk, gure aldetik irabazlea ez ezik parte hartzaile guztiak zoriondu nahi ditugu.

Read more...